Vieiros

Vieiros de meu Perfil


Máis Alá

Xestionado por Vieiros
RSS de Máis Alá
LEDICIA, ÚNICA CORAL ESCOLAR ESTÁBEL EN GALEGO

"Algunhas administracións dicíannos que non faciamos normalización da lingua"

A agrupación ferrolá publica 'Estiñada' un álbum e DVD recompilatorio que celebra os seus 25 anos de historia.

Marcos S. Pérez - 18:26 30/01/2008

Ledicia naceu en 1983 con motivo do festival Cantareliñas, un certame que se celebrou en San Sadurniño até 1990, cando esmoreceu. Co impulso de Ánxela Loureiro, mestra de galego, e do querido músico ferrolán Miguel Varela Suárez (Miguel Tranquilo), o coro asentouse no colexio Manuel Masdias de Caranza. Non sen dificultade, o grupo foi gravando cancións e modificando os seus integrantes, até a chegada ao colexio de Xosé Lastra, que lle deu un novo pulo.

En 1998 Ledicia gravou o seu primeiro álbum, Polo correo do vento, un disco recompilatorio do traballo dos quince anos anteriores: "Chegou nun momento no que a xente que estabamos detrás do grupo estabamos un pouco cansos, polas dificultades que atopabamos", explica Lastra. Ledicia nunca tivo o apoio das administracións: "presentámonos varias veces a convocatorias da Deputación da Coruña, pero dicíannos que non faciamos ningún tipo de acción normalizadora da lingua".

Pero o coro seguiu adiante, ofrecendo máis dun cento de recitais por toda Galiza, e tamén fóra: Xixón, Madrid, Rotterdam e Bruxelas. Cada ano con novos integrantes que chegan ao colexio, pero con colaboradores que se manteñen, entre eles moitos antigos alumnos, como Xurxo Varela (fillo de Miguel Tranquilo e María Manuel), a quen Lastra tivo de alumno en sétimo de EXB. E colaboradores ilustres, como María Manuela, Mini e Mero, Manuel Lombao ou Manolo Bragado.

CD e DVD

Todos eles aparecen no DVD que acompaña o segundo disco do coro, Estiñada, que inclúe vídeos de actuacións dos 25 anos de historia do grupo, entrevistas, un karaoke e imaxes do concerto ofrecido hai uns meses para conmemoraras vodas de prata de Ledicia. O repertorio, integramente en galego, inclúe unha maioría de pezas orixinais, compostas polos propios alumnos do centro, por Xosé Lastra ou por Miguel Tranquilo. Algunha de Mini e Mero e algún clásico como Lela.

Nos vindeiros dous meses Ledicia ofrecerá cinco actuacións, en Bandeira (22 de febreiro), Gondomar (24 de febreiro), Boiro (15 de marzo), Muros (16 de marzo) e Tui (27 de marzo).

A Buxaina

A Ecoloxista

Polo correo do vento


5/5 (11 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: