Vieiros

UK Subs e The Vibrators, referentes do punk nos últimos setenta, encabezan o cartaz do Combat Fest, que se celebrará este sábado en Bueu, na Sala Zona (Polígono de Castiñeiras). Ademais, actuarán os californianos Total Chaos, e os galegos Skarmento e Skacha. As entradas xa están á venda a un prezo de 16 euros mentres que na billeteira venderanse a 20 euros.

Os UK Subs conservan case intacta a formación orixinal do grupo, con Charlie Harper (voz), Alvin Gibbs (baixo) e Nick Garret (guitarra). Son sen dúbida un dos grandes referentes do punk de mediados dos setenta coas súas cancións acelaradas e dun claro compoñente político. The Vibrators non quedan atrás, pois foron teloneiros dos Sex Pistol e The Stranglers, e en 1977 foron os encargados de abrir a xira doutros dous grandes do rock, Iggy Pop e David Bowie. O seu album máis aclamado foi Pure Mania.