Vieiros

A única Escola Oficial de Idiomas (EOI) no espazo Galeuscat onde se inclúe unha das linguas cooficiais no Estado, alén da propia, é a de Drassanes, en Barcelona, onde cursan éuscaro un total de 154 alumnos. Porén, hai uns cinco anos a EOI de Santa Coloma de Gramenet (Barcelona) abriu a matrícula para galego, xa que é unha zona onde hai unha grande colonia de emigrantes de Galiza, pero segundo informou para Europa Press a Generalitat catalá "non se matriculou ninguén" e canceláronse as clases.

No caso de Galiza, os centros que dependen da Xunta non acollen as outras linguas cooficiais do Estado porque "non se detectou a demanda", segundo explican desde a Consellaría de Educación, malia que de constatarse a "necesidade", a Xunta "estudaría a posibilidade" de incluílas na programación. Nese sentido, desde a administración explican que a propia oferta recente de chinés ou xaponés nas EOI responde a esa detección da demanda.

En contraposición, si se pode estudar galego en Castela e León, concretamente en Ponferrada; e en Madrid; mentres que a escola oficial de León vaino incorporar o ano que vén, segundo lle ratificaron fontes da Secretaría Xeral de Política Lingüística a Europa Press.

Galego no mundo
Por outro lado, hai un total de 45 centros de estudios galegos en 17 países nos que se pode estudar galego, dende Arxentina, Brasil e Estados Unidos até Australia, pasando por Alemaña, Finlandia, Hungría, Francia, Reino Unido e Rusia, entre outros. No Estado español, existen diferentes lectorados de galego, en diversas facultades de filoloxía, situados nas universidades de Bilbao, Vitoria, Barcelona, Madrid, Granada, Murcia e Salamanca.