Vieiros

Vieiros de meu Perfil


GZ-Deportiva

Xestionado por Vieiros
RSS de GZ-Deportiva
Fran, ex capitán do Súperdepor

"O Deportivo nunca tratou ben aos seus veteranos"

O futbolista di sentirse doído por non poder defender "o escudo e a camisola orixinal coa que tanto gocei". Entrevista feita pola Liga de Fútbol Indoor, a dos veteranos.

Redacción / Manu Martín, Edu Fernández e Javi Martín - 12:30 14/02/2008
Cando xogaba no Súperdepor

Cando xogaba no Súperdepor

A Liga de Fútbol Indoor 2008, a primeira liga dos veteranos do fútbol estatal, comezou mediado o pasado mes de xaneiro. Naquela altura, o Deportivo debutou contra o Athletic, en Bilbo. Era dos poucos equipos dos veteranos que non conseguira o apoio do seu clube, que nin sequera lles deixaba levar as camisolas oficiais.

Dende a Liga de Fútbol Indoor chegou a Vieiros unha entrevista feita con Francisco Javier González, Fran, o mítico capitán daquel Súperdepor, un "deses amantes do funambulismo feito fútbol", contan. Velaí vai:

Pases imposíbeis, pinchacarneiros con sabor a caneo ou tiros de estética doce e envelenada; nada é inalcanzábel para este galego que segue deleitando a vellas e novas xeracións na Liga Estatal de Fútbol Indoor. O capitán do Súperdepor segue regalando leccións.

A vindeira sexta feira volven á competición despois do seu extraordinario debut ante o Athletic de Bilbao, Tiñan ganas?

Por suposto que tiñamos ganas. Aquel partido foi moi especial porque todos os que o xogamos volvémonos sentir futbolistas. Foi marabilloso e agardamos repetir sensacións esta sexta, aínda que supoño que vai ser aínda mellor, por ese aquel de xogar na casa, ante a nosa xente.

Aquel encontro foi considerado por moitos como un dos mellores deste campionato, pola competitividade que houbo. De feito, até chegaron a verse entradas duras e varios cartóns...
É certo, pero é que somos así. Os futbolistas que xogamos nesta Liga temos a competitividade no sangue. Dito doutro xeito: non sabemos facer outra cosa que saltar a un terreo de xogo e procurar a vitoria. De non ser así, de non ter arelas de triunfo a cada paso que damos, nunca teríamos chegado tan lonxe no mundo do fútbol.

O que queda claro é que, pese a ser un dos equipos desta Liga con menos experiencia no Fútbol Indoor, a súa adaptación foi moi rápida.

Ficamos moi contentos con como temos xogado. Como dis, nunca o tiñamos feito, polo menos non ao nivel de outros equipos como o Barça, o Real Madrid ou o Atlético de Madrid. Aínda que quedan cosas por mellorar, creo que temos un bo nivel.

Que cousas quedan por mellorar?
Cuestións básicas e vitais neste deporte. Por exemplo, xogar coa parede. O noso maxín segue pensando que non existe, aínda que a vexamos, e desenvolvemos o noso fútbol sen aproveitar as vantaxes que ofrece, por exemplo, para coller rexeites ou fuxir dos rivais. Tamén temos que adaptarnos á superficie. É algo máis lenta do que o céspede tradicional, no que todos temos xogado e, persoalmente, aínda teño que saberlle os segredos.

Pois non se nota. De feito, Juan Sánchez comentou que Valencia e Depor poden ser as revelacións desta Liga.

Sempre se agradece recibir este tipo gabanzas. De feito eu son o primeiro que apostaría, sen medo, por este Depor, mais, se o fixese sería un insensato.

Por que?
Nesta competición hai tres factores que son fundamentais. O primeiro é a condición física, ámbito no que non andamos moi finos porque non nos deixan adestrar como queremos. En segundo lugar, é importante contar con xogadores retirados hai non moito, e algúns dos nosos xogadores levan máis tempo inactivos que outros futbolistas desta Liga. En terceiro lugar, hai que ter en conta as lesións; por fortuna aínda non sufrimos ningunha, pero sempre están aí, á espreita, e hai que valoralas para non deixarnos levar pola euforia.

Mencionou as dificultades que teñen para adestrar. Este problema, xunto co rexeite por parte do clube a cederlles equipamentos e mesmo a deixarlles usar o escudo do equipo, estaos afectando?
Afectar, o que se di afectar, non é que afecte moito, porque somos moi profesionais e estamos centrados en facelo ben. Si é certo que nos doe, porque a todos nos gustaría defender o escudo e a camisola orixinal coa que tantas tardes nos temos vestido e á que estes xogadores tanto lle teñen dado.

Por que esa negativa do Deportivo e do seu presidente, Augusto César Lendoiro, a darlles as mesmas facilidades que, por exemplo, si reciben por parte dos seus clubes o resto de participantes desta Liga?
Se son sincero, creo que non hai nada novo nesta actitude. O Deportivo da Coruña nunca tratou ben aos seus veteranos; sempre foi así. A única diferenza co que acontecía hai años radica no tirón mediático de algúns dos futbolistas que se acaban de incorporar a este grupo. Moitos deles foron grandes xogadores mundiais e iso fai que a xente se fixe máis no que fai a Asociación de Veteranos e cales son as súas necesidades. Por iso toda esta problemática e polémica parece nova, mais, segundo o que nos contan os directivos máis antigos da asociación, as cosas non cambiaron moito.

Mais, malia todo, A Coruña e Galiza están con vostedes...
O que estamos vivindo na Coruña está a ser espectacular. A xente apóianos e empréstanos case a mesma atención e o mesmo cariño co que nos agarimaban cando eramos membros do primeiro cadro de xogadores. Para este debut na casa está prevista unha gran afluencia de público e isto énchenos de orgullo porque, á fin, ese é o noso cometido: conseguir que os espectadores gocen véndonos xogar.

Se se quere ler a entrevista completa, velaquí está.


4.83/5 (6 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



Outra imaxe de Fran, dos tempos do Súperdepor
Outra imaxe de Fran, dos tempos do Súperdepor
Co equipamento do equipo de veteranos
Co equipamento do equipo de veteranos
Coa directora xeral para o Deporte, Marta Souto, presentando a Oficina Galega de Atención ao Deportista
Coa directora xeral para o Deporte, Marta Souto, presentando a Oficina Galega de Atención ao Deportista
O 11 inicial do Depor de veteranos, que xogará esta sexta feira no Palacio dos Deportes de Riazor
O 11 inicial do Depor de veteranos, que xogará esta sexta feira no Palacio dos Deportes de Riazor