Vieiros

Vieiros de meu Perfil


Fwwwrando

RSS de Fwwwrando
ESTUDO XEOFÍSICO

As reservas de hidrocarburos de Titán superan os xacementos da Terra

Un grupo de investigadores conclúe que o satélite de Saturno posúe centos de veces máis material combustíbel ca o que existe no noso planeta.

Redacción - 13:30 14/02/2008
Imaxe de Titán tirada pola sonda Cassini / NASA

Imaxe de Titán tirada pola sonda Cassini / NASA

A lúa máis grande de Saturno, Titán, posúe centos de veces máis hidrocarburos líquidos que todas as reservas de petróleo e de gas da Terra. Estas son as conclusións dun estudo dirixido por Ralph Lorenz e publicado nas Geophysical Research Letters, baseándose nos datos da sonda Cassini.

O traballo do Laboratorio de Física Aplicada da Universidade Johns Hopkins confirma o que xa se sospeitaba: o satélite laranxa está cheo de compostos do carbono e de produtos químicos orgánicos. De feito, chove hidrocarburos, que enchen a superficie da lúa formando mares e lagos. O metano e o etano, a 179 graos baixo cero, xogan o mesmo papel que ten a auga na Terra. En Titán tamén hai dunas que conteñen material orgánico nunha cantidade moi superior ás reservas de carbón do noso planeta.

Porén, o resultado destes estudos non ten como obxectivo promover campañas de exploración das compañías petroleiras, senón investigar como xurdiu a vida na Terra e se existe algún tipo dela en Titán. A Cassini volverase achegar a Titán o 22 de febreiro. Nese momento, o seu radar estudará a zona onde aterrou a sonda Huygens da Axencia Espacial Europea.


5/5 (4 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: