Vieiros

O Coinasa Liceo non saberá do seu rival nos cuartos de final da Liga Europea até que terminen de xogar as finais os distintos grupos, o vindeiro 15 de marzo. O conxunto coruñés, líder xa clasificado do grupo D, terá que se enfrontar ao campión do grupo C, que será o Candelaria ou o Reus Deportiu.

Até o de agora os portugueses van de primeiros, con 12 puntos, despois de terlle gañado ao Cronenberg alemán por 0-5. O Reus é segundo con 10 puntos, e tería que gañar, pois non lle vale outra cousa, para pasar á final a catro, posto que o Candelaria xa sairía beneficiado após un reparto de puntos.

O outro clasificado e principal rival, o Barça
Outro dos equipos xa clasificados é o Barça, primeiro do grupo A, con cinco vitorias en cinco partidos. Xogará contra o campión do grupo B, que sairá na última xornada, do partido que han xogar Vic e Oporto.

Deste xeito, o Liceo evita xogar directamente contra o Barça, o gran favorito para o título, pero, se as cousas van ben, podería telo de rival na final. As semifinais hanse xogar o 10 e 11 de maio no Palau Blaugrana.