Vieiros

Este martes tivo lugar un novo xuízo por acoso laboral contra Adolfo Campos Panadero, alcalde popular do Concello de Dozón, denunciado pola funcionaria Ana Lois Navaza. Numerosos veciños e membros da dirección sindical da CIG achegáronse até o xulgado número tres do Penal de Pontevedra para apoiala.

Non é a primeira vez que Campos é xulgado e condenado por este delito. Máis de trinta sentenzas firmes favorábeis á demandante estiman que o alcalde de Dozón acosou sistematicamente a Lois dende 1999 con continuas modificacións nas súas condicións de traballo. Desta volta, o xuízo foi pola vía do penal.

Actualmente, Ana Lois está destinada nun almacén das dependencias municipais -que incumpre a normativa en saúde laboral-, sen calefacción nin electricidade, e sen labor ningún encomendado. Malia ser condenado a pagar 6.000 euros e, evidentemente, a cumprir a lei, Adolfo Campos segue sen modificar as condicións laborais da funcionaria e, xa que logo, -presuntamente- a delinquir.

A Fiscalía pide a libre absolución, e Campos fala de "xuízo político"
Porén, no xuízo deste martes, o fiscal pediu a libre absolución do acusado por considerar que "a esfera penal queda grande para reparar este ataque, que non é o suficientemente intenso", ou considerar que non constitúe delito penal por "non haber unha clara intencionalidade do alcalde".

O avogado defensor de Adolfo Campos, no seu alegato final, cualificou o xuízo de "querela instrumental á catalá, que busca a chantaxe e o desprestixio". O propio acusado acolleuse ao seu dereito de non declarar por considerar que estaba diante dun "xuízo político".

Pola súa banda, o avogado de Lois, Carlos Davila, solicitou o amparo da xuíz, xa que existen numerosas sentenzas firmes que certifican que a día de hoxe non se modificou a situación laboral da querelante. Diante destes "feitos claros e constatados", solicitou a que Campos fose declarado culpábel dun delito de prevaricación xa que "tomou decisións arbitrarias que non respectan a legalidade e que constitúen un delito continuado no tempo" de 232.820 euros..

"Sen forzas"
Ana Lois preferiu non facer declaracións polo momento, despois de revivir diante da xuíz durante case 90 minutos o seu 'calvario' dende que concorrera ás eleccións municipais na candidatura do BNG e posteriormente se presentara na candidatura da CIG, pola que saíu electa como representante sindical.

"Estou derrotada; onte estiven co meu acosador no xulgado e hoxe teño que volvelo ver no concello", afirma. "Non teño forzas para falar máis nada, teño o corpo como se estivese a desbrozar todo o día no monte", confesa Ana Lois.

No xuízo deste martes declararon tamén o daquelas responsábel comarcal da CIG-Administración, Henrique Outeiral, unha traballadora social e funcionaria do concello, veciños de Dozón, unha persoa da asesoría fiscal, e tres peritos psiquiátricos. Todos eles ratificaron as palabras de Ana Lois. O caso está visto para sentenza.