Vieiros

Hai xa case tres meses que se fixo pública a sentenza que obrigaba á ACB a admitir ao Obradoiro, na tempada 2008-2009 da primeira liga estatal, mais, até o de agora ningunha das partes implicadas comunicou nada sobre o que vai acontecer co clube compostelán.

Aínda non se sabe se o equipo vai poder xogar na mellor liga europea, mais as especulacións son abondas. O clube compostelán leva todo este tempo movéndose para conseguir un financiamento sólido que lle permitise manterse toda a tempada; ao tempo que se ouviron ruxerruxes sobre a posibilidade de que o Obradoiro vendese a súa praza a outro clube con máis cartos.

Por outro lado, dende a ACB nada se dixo aínda. Só que os servizos xurídicos do organismo están aínda estudando a sentenza, e que non pensan aínda nun prazo para anunciar a súa resolución.

Segundo conta o xornal El Correo Gallego, as xuntanzas co CSD (Consello Superior do Deportes) foron constantes dende novembro, posto que a ACB quere ser escoitada xa que, de admitir ao Obradoiro, a liga quedaría con 19 equipos, un número impar que prexudicaría todo o sistema instaurado hai anos.