Vieiros

A nova xeración de antidepresivos posúe poucos beneficios clínicos para a maioría dos pacientes, segundo un estudo británico realizado por científicos da Universidade de Hull, no norte de Inglaterra.
Segundo os expertos, as drogas axudan só a un pequeno grupo de pacientes con casos de depresión aguda.
Con todo, as compañías farmacéuticas encargadas de producir os antidepresivos Prozac e Seroxat, dous dos máis comúns no mercado, dixeron estar en desacordo coa investigación científica.

Un portavoz de GlaxoSmithKline, que produce Seroxat, indicou que o estudo só analizou "unha pequena porción da información total dispoñible". Eli Lilly, produtora de Prozac, dixo que "a experiencia científica e médica demostrou que ese medicamento é un antidepresivo efectivo". Os pacientes foron advertidos de que non deixaran de tomar a medicación sen consultar primeiro ao médico.

O equipo da Universidade de Hull, que publicou o seu informe na revista especializada PLoS Medicine, revisou información de 47 probas clínicas.