Vieiros

A partir de abril, as compañías eléctricas terán que incluír no recibo da luz unha etiqueta, cun deseño uniforme e oficial, que indique a orixe da electricidade vendida ao consumidor e o impacto ambiental provocado na súa xeración.

Así figura nunha circular da Comisión española da Enerxía (CNE), publicada a pasada semana no Boletín Oficial do Estado (BOE), que lle outorga ao usuario o dereito a coñecer ambos os dous aspectos sobre a electricidade que consume.

Nas novas etiquetas especifícase a orixe da enerxía consumida, as emisións de dióxido de carbono (CO2) que xera, os residuos radioactivos asociados e o seu impacto sobre o ambiente.

As empresas deberán incluír ademais dous gráficos de barras, un de emisións e outro de residuos, ordenados do "A" ao "G", onde a primeira letra represente o mínimo impacto ambiental e a última, o máximo.

Etiqueta estándar
Ademais, a CNE desenvolveu un sistema de garantía mediante o cal os consumidores poderán acreditar ante terceiros que consumen enerxía 'verde'. Esta etiqueta vai permitir a comparación entre provedores.

Coas novas etiquetas, van desaparecer os quilovatios hora (kWh) xenéricos e distinguirase entre quilovatios 'verdes', 'eficientes' e 'convencionais'.