Vieiros

Vieiros de meu Perfil


Venezuela

Edición xestionada por Xurxo Martínez Crespo
RSS de Venezuela
DECLARACIÓNS DO PRESIDENTE VENEZUELANO ANTE O ASASINATO DE RAÚL REYES

"Hoxe o Goberno de Colombia é a máis grande ameaza en Latinoamérica"

Afirmou o presidente Chávez que en Colombia quen manda é o Goberno de Estados Unidos. Insistiu na gravidade da situación xerada polas accións militares de Colombia na fronteira con Ecuador, e afirmou que a oligarquía colombiana sente apoiada porque sabe que ten o respaldo dos Estados Unidos.

Xurxo Martínez Crespo - 11:20 03/03/2008

"Non poderá o lacaio Uribe coa integración bolivariana dos nosos pobos", apuntou, ao considerar que o Goberno colombiano converteuse na maior ameaza para os pobos da rexión latinoamericana. Insistiu Chávez na súa advertencia para que quen gobernan en Colombia non se sigan equivocando, "porque pagarían moi caro a oligarquía colombiana e ese goberno monicreque do imperio estadounidense".

"Estou indignado, Hugo, este home mentiume"


Desde o estado Zulia o presidente Hugo Chávez reiterou todo o apoio do pobo venezuelano ao seu colega do Ecuador, Rafael Correa, a quen catalogou como un mandatario valente e digno. Manifestou que durante a conversa telefónica que sostivo con Correa, este expresoulle a súa indignación pola mentira coa que o mandatario Álvaro Uribe tratou o caso.

"Estou indignado, Hugo, este home mentiume, ti tiñas razón", foron as palabras do presidente ecuatoriano ao apuntar que en efecto as tropas de Colombia chegaron ao sitio, bombardearon a área e mataron aos rebeldes mentres durmían, para logo entrar por terra a recoller algúns dos cadáveres mentres que deixaron outros 17 mortos no lugar e dúas guerrilleiras feridas.

Acoutou que a actual situación cáusalle dor, dado o amor que garda o pobo venezuelano polo de Colombia, do que dixo estar seguro de que "algún día liberará a súa patria da presenza nefasta do imperio estadounidense".

Reiterou que o Goberno mantense en plena avaliación dos acontecementos, que se desataron a partir da incursión militar colombiana en territorio ecuatoriano, onde resultou morto o comandante número 2 das Farc-Ep xunto a outros 16 guerrilleiros. Afirmou que tales feitos foron cometidos por "o Goberno dos Estados Unidos, que é o que manda en Colombia, verdadeiramente".

Recordou que durante anos tamén Venezuela estivo gobernada desde Washington, pero que esa situación cambiou porque neste momento é un país libre que nunca máis será unha colonia. Por esta razón chamou á reflexión aos pobos e gobernos do continente suramericano, para que se dean conta da gravidade do asunto máis aló do manexo mediático da maioría das empresas informativas, as cales están en mans da oligarquía latinoamericana, segundo expresou.


3.67/5 (6 votos)