Vieiros

O axente de viaxes británico Steve Marshall, afincado nas Canarias, descubriu como, un día, de repente, a maioría das súas páxinas web, especializadas en organizar vacacións de cidadáns europeos na illa caribeña, deixaron de funcionar. Páxinas que tiña operativas dende 1998, como cuba-hemingway.com, ciaocuba.com, bonjourcuba.com ou cuba-havanacity.com desapareceron por orde do goberno dos Estados Unidos.

Despois de pensar que se trataba dun fallo, púxose en contacto coa empresa coa que rexistrara os dominios, que lle contestou que o Departamento de Tesouraría os incluíra na súa lista negra, polo que houbo que desactivalos. Marshall está indignado polo feito de que non se lle notificasen os feitos, e máis tendo en conta a súa nacionalidade e o seu lugar de residencia. Xa rexistrou os mesmos dominios baixo o sufixo .net cunha firma europea para evitar que se volvan repetir os feitos. Entre tanto, os servidores estaban nas Bahamas.

O axente tamén se estrañou polo feito de que se poidan censurar webs sen sequera a intervención dun xuíz, segundo a lei estadounidense. Segundo un voceiro do departamento estadounidense, a compañía de Marshall axudou estadounidenses a evadiren as restricións para viaxar a Cuba e foi un "xerador de recursos que o réxime Cubano usa para oprimir o seu pobo".

Segundo informa o New York Times, hai un dominio de Steve Marshall que o Departamento de Tesousaría non pechou: cuba-guantanamo.com.