Vieiros

A Asemblea do Suído (Federación Ecoloxista Galega) pídelle explicacións ao tenente alcalde polas súas declaracións xa que non entende por que no ano 2005 estaba a favor da canteira e agora non. A Asemblea do Suído pensa que o goberno de Covelo ten dúas caras segundo lle conveña, practicando así o oportunismo político.

O problema do goberno municipal é que nunca creu nas demandas de protección da Serra do Suído (tal como as vén facendo esta asociación dende hai moitos anos) e agora que a Serra do Suído vai ser por fin incluída na Rede Natura 2000, quérense apuntar o tanto a pesar de non ter apoiado en ningún momento o traballo desta asociación e de tódalas demais persoas que si apostaron pola súa protección.

É máis, dende o goberno municipal puxéronse atrancos a moitas das actividades desta asociación e ante as agresións ambientais no Suído (parques eólicos, canteiras, minicentrais...) responderon co silencio, cando non activamente como cómplices. Así o concello de Covelo é promotor dun parque eólico nunha zona que logo do traballo desta asociación está libre de aeroxeradores (botáronse abaixo 3 parques eólicos promovidos por Eurovento), no mesmo lugar onde se proxectan agora as canteiras.