Vieiros

A Reserva Federal dos EUA anunciou este martes que ampliará o seu programa de empréstitos cunha liña de crédito temporal en valores de até 200.000 millóns de dólares e ampliando os seus acordos de intercambio co Banco Central Europeo e máis co Banco Nacional de Suíza. A inxección en valores do Tesouro con vencemento a 28 días ten como obxectivo promover a liquidez nos mercados de financiamento para valores do Tesouro e outros colaterais e impulsar o funcionamento dos mercados financeiros en xeral.

Segundo a Reserva Federal, poñerase a disposición das entidades mediante poxas semanais, a primeira delas o 27 de marzo. Paralelamente, a institución estadounidense, presidida por Ben S. Bernanke, informou de que o Comité de Política Aberta da Reserva autorizou un incremento dos acordos temporais recíprocos sobre divisas que mantén co BCE e co banco central suízo, que durarán até o 30 de setembro. Mediante estes acordos, o BCE Poderá proporcionar até 30.000 millóns de dólares, fronte aos 20.000 do anterior acordo, mentres que o seu homólogo suízo poderá poxar até 6.000 millóns de dólares, 2.000 máis do acordado en decembro.