Vieiros

Foron case tres milleiros de sitios web cerrados durante os últimos doce meses. Así o recolle o informe 2007 do colectivo Reporteiros sen Fronteiras, RSF, que na súa última edición subliña especialmente a presión censora ao xornalismo e os xornalistas en internet. RSF avisa de que a información en internet xa está en moitos lugares tanto ou máis censurada que a prensa tradicional. Segundo o reconto deste colectivo, no último ano foron ao cárcere 65 persoas debido ás reflexións escritas nas súas bitácoras, cun total de 37 blogueiros a xuízo e dúas ducias de ataques e agresións a autores de blogs. Países coma China ou Arabia Saudí son os máis criticados por este tipo de prácticas.

Por outro lado, hai poucos meses o grupo, OpenNet Initiative, colectivo de expertos vencellados ás universidades de Cambridge, Oxford, Harvard e Toronto, publicaban un informe sobre a censura en internet onde advertían de que os ataques á liberdade de expresión acontecen a miúdo mesmo no contorno de Europa. "En menos dunha década, a internet europea evolucionou desde a ausencia de controis até unha situación onde a maioría dos estados, especialmente na propia UE, filtran o acceso aos contidos", critican.

O día en favor da liberdade de expresión en internet está apoiado pola Unesco e Reporteiros sen Fronteiras. Na web de RSF poden consultar a guía do ciberdisidente.