Vieiros

Hungría foi o primeiro dos tres gobernos en anunciar que inicia de xeito inmediato os trámites necesarios para estabelecer relacións diplomáticas co novo estado independente. Anteriormente e nun comunicado conxunto, Hungría, Croacia e Bulgaria xa avanzaran a súa decisión neste sentido.

O executivo húngaro explica que Kosovë, tal e como se denomina oficialmente en lingua albanesa o novo estado independente, só poderá superar a crise actual cunha independencia "controlada internacionalmente". O texto indica tamén que o acontecido en Kosovë debera entenderse como un caso "único" e non ser utilizado como punto de referencia noutras demandas de independencia.

Por outro lado, o comunicado de húngaros, búlgaros e croatas tamén chama a respectar as minorías existentes no novo estado, en atención aos serbo-kosovares. Ademais, salientan a súa intención de aumentar as relacións bilaterais "co pobo serbio".

Fronte ao anuncio, o ministro serbio de Exteriores, Vuk Ieremic, advertiu de que os países que recoñezan a independencia kosovar "non poderán esperar ter boas relacións con Serbia".