Vieiros

Vieiros de meu Perfil


Edición xeral

RSS de Edición xeral
Rosana Navarro, observadora en Marrocos

"As torturas aos saharauís son reais"

Avogada do Colexio de Pontevedra, coñeceu de primeira man o 'funcionamento' do sistema xudicial marroquí. Mentres, continúan as negociacións entre as partes.

Fernando Arrizado - 19:27 23/03/2008
Said El Baillal

Said El Baillal

A principios deste ano, o tribunal de apelación de primeiro grao de Rabat (Marrocos) condenou a Said El Baillal, profesor da Universidade Mohamed VI e membro do Comité de Defensa do Dereito de Autodeterminación do Pobo Saharauí (CODAPSO), a oito meses de prisión e a unha multa de 500 dirham (uns 50 euros ao cambio, mais moito máis a nivel adquisitivo)

Rosana Navarro, avogada do Colexio de Pontevedra e observadora voluntaria, viaxou o pasado mes de xaneiro a Rabat, formando parte dunha delegación do Observatorio de Dereitos Humanos do Colexio de Avogados de Badaxoz -un organismo moi activo no conflito do Sáhara Occidental-, para comprobar que se cumpría a legalidade durante este proceso xudicial.

"Que declarou", contesta Navarro preguntada polo máis destacado do xuízo a El Baillal, detido por participar nunha manifestación pacifica. "É algo totalmente inusual nos procesos contra saharauís que o acusado declare", recoñece.

Aínda que a condena "non está nada mal para ser saharauí", a tamén socia de Solidariedade Galega co Pobo Saharauí afirma que "dende o principio houbo unha violación dos dereitos humanos" neste caso, que "puido ser moito peor de non estar nós alí".

Importante labor dos observadores

"A presencia de observadores internacionais nos xuízos a saharauís cumpre un importantísimo labor, xa que permite que se reduzan as violacións neste tipo de procesos políticos", considera, e critica que a Misión das Nacións Unidas para o referendo do Sáhara Occidental (Minurso) non sexa o que leve a cabo con eficacia esta función.

El Baillal foi condenado por "manifestación armada", "desobediencia", "golpes e feridas a funcionario durante o exercicio da súa función", "destrución de bens públicos" e "posesión de material combustible", segundo recolle o auto xudicial.

Porén, Rosana Navarro asegura que tanto as probas como as dúas testemuñas que o acusaron de ser o organizador da manifestación en que o detiveron foron obxecto de manipulación, e que a protesta, levada a cabo hai case un ano, foi pacífica.

Golpes, correntes eléctricas...

"As torturas son reais", confirma a letrado. "A detención de El Baillal foi agresiva e no tempo que estivo detido as torturas foron constantes", engade: "Os golpes, as correntes eléctricas ... son habituais, ademais da incomunicación á que os someten".

Por outra banda, Rosana Navarro confirma que a delegación de observadores estivo controlada polas forzas de seguridade marroquís dende o primeiro momento. "Cando chegas adxudícanche un número, e escriben un comentario ao seu lado", di. Ademais, confesa: "Un coche seguiunos en todo momento. Fixéronnos fotos. E o día que marchabamos, mesmo os taxistas non nos querían levar ao aeroporto".

A pasada quinta feira, Marrocos e a Fronte Polisario mantiveron en Manhasset (Nova York) unha nova xuntanza -a cuarta- ao abeiro da ONU, co fin de estabelecer un novo status para o Sáhara Occidental. Representantes de Mauritania e de Alxeria estiveron presentes na reunión. As partes acordaron continuar coas negociacións, informa a axencia internacional de noticias Afrol News.


5/5 (9 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: