Vieiros

"Eu creo que con relación a Ence-Elnosa, imos intentar acurtar ese prazo de 2018, e eu espero que en datas moi próximas vai haber noticias moi importantes, non concluíntes, pero si un salto cualitativo importante, que será bo para a empresa, para os traballadores e para os cidadáns". Así o explicaba este domingo o conselleiro de Medio Ambiente, o socialista Manuel Vázquez, para os micrófonos da Cadena Ser.

Vázquez admitiu que o único claro é que a Ría de Pontevedra estará "libre de empresas contaminantes" na altura do ano 2018, pero non aclarou o momento no que se encontra a procura de localizacións alternativas para que esa saída da ría se produza antes. Con todo, asegurou que se está traballando "no bo camiño" e afirmou que "hai perspectivas bastante razoábeis". "As situacións alternativas téñenas que buscar as empresas", dixo, "pero todos queremos que se queden en Galiza". Preguntado polo posíbel traslado do complexo industrial até o Concello d'As Pontes, o conselleiro explicou que "sería unha opción se á empresa lle vale", estremo no que, advertiu, aínda quedaría pendente analizar ambientalmente a súa viabilidade".