Vieiros

Vieiros de meu Perfil


Edición xeral

RSS de Edición xeral
O REFERENDO SERÁ EN 2010

Escocia inicia a segunda fase do seu 'diálogo nacional' cara á independencia

O Primeiro Ministro, Alex Salmond, anunciou que os cidadáns deberán escoller entre manter a actual autonomía, aumentala ou acadar a independencia total.

Redacción - 19:45 26/03/2008

En agosto de 2007 Alex Salmond presentou a National Conversation, o debate nacional que debía preparar a Escocia para a súa independencia, e no que se convidaba a participar a partidos, entidades e cidadáns. Naquel momento o Primeiro Ministro e líder do Scottish National Party (SNP) puxo sobre a mesa o 2010 como momento probábel para a celebración dun referendo no que os cidadáns deberían decidir o futuro do país. Este mércores Salmond reafirmouse no seu obxectivo de consultar aos escoceses no ano 2010, ao tempo que anunciaba o comezo da segunda fase do diálogo nacional.

Salmond convidou á "sociedade civil escocesa" (empresas, colectivos sociais, igrexa...) a participar no debate e facer as propostas. O líder do SNP declarou que "este debate é meirande que calquera partido; está na base do que somos e do que queremos ser como país. Un debate tan importante pide que o pobo de Escocia tome a decisión final nun referendo"

Ademais, detallou algúns aspectos do referendo de autodeterminación, no que os escoceses deberán escoller entre tres opcións: a independencia total, o mantemento da actual autonomía ou unha substancial mellora do autogoberno. A votación realizarase por un sistema de voto preferencial (single transferable vote), na que os cidadáns deberán escoller unha primeira e unha segunda opción, un sistema xa empregado nas eleccións locais escocesas.

Salmond insta á oposición a presentar unha proposta alternativa
A vía intermedia da mellora do autogoberno é compartida polos partidos da oposición no Parlamento de Holyrood: laboristas, liberais e conservadores, que este martes comezaron os traballos dunha comisión parlamentaria na que non participa o SNP, e que deberá analizar o funcionamento da autonomía escocesa nos últimos anos e facer propostas para a súa mellora e para o aumento das súas competencias.

De feito, o anuncio de Salmond interprétase como unha resposta ao comezo dos traballos desta comisión, coa que os partidos opostos á independencia buscaban recuperar a iniciativa no debate sobre o aumento do autogoberno, unha demanda compartida pola maioría dos cidadáns escoceses. Salmond dirixiuse aos partidos da oposición para instalos a que presenten unha proposta alternativa á independencia.


Ligazóns

4.92/5 (13 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: