Vieiros

O presidente de Montenegro, Filip Vujanovic, logrou a reelección nas eleccións presidenciais organizadas este domingo na ex república iugoslava, co que se consolida o dominio político do Partido Democrático Socialista, segundo revelou a axencia independente CEMI.

As estimacións danlle o 52,3% dos votos, co que lograría renovar o seu mandato sen necesidade de ir a unha segunda volta. Os resultados baséanse nun reconto parcial, polo que haberá que esperar aos resultados oficiais, que se publicarán ao longo da xornada do luns.

"Esta é unha vitoria para todos nós, polo noso Montenegro e por un futuro mellor", anunciou Vujanovic tras coñecer os resultados. "Tamén quero expresar a miña gratitude para aqueles que votaron pola oposición. Eu serei o presidente de todos os montenegrinos", engadiu.

Os rivais foron Andrija Mandic, da Lista Serbia, que segundo as proxeccións da CEMI conseguiu o 19,3% dos votos; Nebojsa Medojevic, do Movemento para os Cambios (PZP), o 16,7%, e Srdjan Milic, do Partido Socialista Popular (SNP), o 11,3%.