Vieiros

Rock Mariño continúa descubrindo a novas bandas musicais da Coruña, e dándolles a oportunidade de tocar en directo en cinco das salas máis importantes da cidade: Forum Celticum, o Garufa, o Jazz Vides, a Mardigrass e o Playa Club. Nesta terceira edición, que comeza este xoves e que se desenvolverá até o vindeiro mes de novembro, serán 26 os grupos que actuarán noutros tantos concertos.

Na presentación do ciclo, María Xosé Bravo, concelleira de Cultura, salientou que "o dinamismo cultural dunha cidade mídese pola oferta cultural e pola capacidade que a súa cidadanía ten para erixirse en protagonista da actividade cultural. As iniciativas que traten de facer máis visíbeis socialmente aos nosos artistas son extremadamente positivas".

Os grupos seleccionados teñen estilos moi variados, dende o rock o blues e o funky, até o folk. Os concertos, que terán lugar os xoves (e algúns venres) e que serán de balde, comezan este 10 de abril coa actuación de Black Bum no Forum Celticum. Nas vindeiras semanas pasarán polas salas coruñesas Shroud of Tears, Esquíos, Rubén Moinelo, Álvaro Muras, Capitán Morgan, Moondogs Blues Party ou Zumbido.