Vieiros

Puxéronlle un nome inglés, á portuguesa, e con 800 euros de apoio outorgados por varias cámaras municipais (a de Lisboa, a de Loures, a do Barreiro e a de Odivelas), a web Carpool.pt comeza a funcionar con forza.

Non é unha iniciativa pioneira en Portugal (xa hai tempo que existe a web Deboleia.com), pero si está a ter un éxito destacado, alén de polos apoios dos municipios, polo número de usurios rexistrados (á volta de 80) dende o pasado mes de marzo, no que comezou a funcionar.

Compartir para gastar e contaminar menos
O concepto, que existe en toda Europa hai décadas (tamén no Estado Español coas webs Compartir.org ou Viajamosjuntos.com) permite compartir o automóbil nos nas viaxes diarios entre casa e traballo, dividindo gastos e diminuíndo o impacto ambiental.

Con esta nova web ofrécese un outro espazo que permite encontrar facilmente a persoas que fagan o mesmo traxecto e que se poidan xuntar nun único coche. O primeiro paso é facer un rexistro de balde en Carpool.pt e, de seguida, indicar no mapa (construído coas imaxes de Google Maps) o punto de partida e o de chegada, ben como os días e os horarios das viaxes. Despois só queda agardar a que xurdan persoas que fagan o mesmo traxecto e que estean interesadas en "compartir a boleia".

O servizo tamén lle permite a cada usuario definir o seu perfil persoal, para que sexa máis simple atopar os compañeiros de viaxe ideais: pódese indicar a idade, se se fuma ou non, e o tipo de automóbil que se posúe (de posuír algún porque tamén se pode apuntar quen non teña coche nin carné, para atopar unha alternativa aos transportes públicos que teña un horario máis propio).