Vieiros

O tratamento das minorías étnicas nos medios de comunicación foi sempre un dos problemas do xornalismo. Para analizar esta situación, este sábado a cidade de Vigo acolle unha xornada presencial do Foro Internacional sobre Comunicación e Minorías Étnicas, organizado polo Observatorio Galego dos Medios do Colexio Profesional de Xornalistas e no que participarán membros do ámbito académico pertencentes das universidades galegas, así como representantes de asociacións relacionadas coas minorías.

Durante esta xornada, falarase sobre a maneira de realizar un tratamento axeitado da información relacionada coas persoas pertencentes a algunha minoría étnica. O obxectivo do Foro é o de dar a coñecer á sociedade as principais conclusións da análise dos medios dende a perspectiva das minorías étnicas e do seu estudo.

As explicacións correrán a cargo de membros do ámbito académico como Diego López, Mar Lorenzo e Rosa Verdugo Matês, das universidades da Coruña e Santiago; así como representantes de asociacións relacionadas coas minorías étnicas, como Mónica Alzate, do Foro da Emigración, Santiago González, da Fundación Secretariado Xitano, e Mustapha El Aboubie, da Asociación Marroquí de Pontevedra. Tamén estarán presentes xornalistas especializados no eido das minorías, como Víctor Omgbá, Juan de Sola e Lara Varela.