Vieiros

Infórmanos Victorino Pérez Prieto, teólogo colaborador de Irimia que participou activamente no impulso desta plataforma, da súa composición e dos contidos dos acordos aos que vai chegando. Nas reunións celebradas hai membros do colectivo Xustiza e Sociedade, do grupo República e Laicidade, da Asemblea Republicana de Vigo, do Seminario Galego de Educación pola Paz, do colectivo Esculca, da Fundación Galiza Sempre, de Europa Laica, e outros grupos e persoas a título individual.

Obxectivos mínimos

A plataforma chegou a algúns acordos básicos que están sendo difundidos entre persoas e colectivos, de cara a procurar novos apoios.

En principio fixáronse os obxectivos mínimos comúns sobre os que basear a difusión do movemento a prol da defensa do estado laico. Estes obxectivos mínimos comúns serían os que seguen:

1. Modificación do apartado 3 do artigo 16 da Constitución Española, de tal xeito que fique clara a laicidade do Estado: “España é un Estado laico” (que respecta todas as crenzas). Suprimir “cooperación”.

2. As actividades relixiosas e de culto das diferentes comunidades relixiosas serán autofinanciadas por estas.

3. Establecer a prohibición de asistencia de funcionarios e cargos públicos, en tanto que tales, a actos relixiosos ou de culto. Impor esta prohibición no Estatuto dos Funcionarios.

4. Denuncia dos Acordos co Vaticano (todos) e revisión, desde estes principios, da Lei Orgánica de Liberdade relixiosa.

5. Eliminar do currículo escolar o ensino relixioso.

Debates

Están en debate aspectos tales como os ámbitos de actuación da plataforma, o grao de compromiso de persoas e colectivos, a estrutura da plataforma e o seu nome, así como os recursos a empregar. Tamén se acordou ampliar o convite a outros colectivos que puidesen estar interesados.

Tratáronse temas como o das esferas nas que se produce vulneración do respecto ao principio de separación das igrexas e o Estado en diferentes esferas da vida social (educacion, financiamento público, actividade institucional, reivindicación feminista, etc.).

Analizouse, así mesmo, a cuestión dos procedementos de traballo, como o do uso da vía parlamentaria no que toca ao primeiro dos obxectivos, ou solicitar de diferentes comentaristas de prensa que se pronuncien sobre o tema, incidindo no asunto do financiamento, agora que comeza a campaña para a declaración da renda.

Tamén se comentou a denuncia do STEG do decreto que regula a situación do profesorado de relixión no ensino medio; a preparación dun curso de verán sobre este tema; a iniciativa dun cidadán que solicitou a mediación da Axencia de Protección de Datos para eliminar os seus dos arquivos da igrexa católica e o interese de difundir este tipo de actuacións.