Vieiros

Vieiros de meu Perfil


Máis Alá

Xestionado por Vieiros
RSS de Máis Alá
'CEA DAS LETRAS'

Marica Campo e Miguel Anxo Murado dan a sorpresa nos premios da AELG

Homenaxeouse a Rubén García, director da Mostra de Teatro de Ribadavia, que recibiu un sentido aplauso de varios minutos de duración.

Redacción - 11:30 28/04/2008

A Cea das Letras da Asociación de Escritores en Lingua Galega entregou o sábado os premios aos autores máis destacados do ano, elixidos polos propios asociados. Houbo sorpresas, como a escolla de Marica Campo e os sonetos do seu Sextinario como a mellor obra poética da tempada, superando a Chisco Fernández Naval ou a Miguel Anxo Fernán-Vello. Ou que o Soño da Febre de Miguel Anxo Murado fose considerada a mellor obra narrativa nun ano no que o Made in Galiza de Sechu Sende fora acaparando todos os premios.

Si eran esperados por todos os premios para Agustín Fernández Paz, por O único que queda é o amor na categoría de Literatura Infantil e Xuvenil; ou o recoñecemento a De provincia a nación: historia do galeguismo político de Xusto Beramendi como o mellor ensaio do 2007.

En canto á tradución, foi premiado o traballo de Yolanda Vilarchao nos Poemas canónicos de Konstantinos Kavafis, editados en galego por Rinoceronte. E en teatro, o gañador foi Millán Picouto, pola súa obra Ciclo de Marte. Finalmente, Xosé Luis Méndez Ferrín fíxose co premio de 'literatura xornalística', un galardón entregado pola AELG e máis polo Colexio Profesional de Xornalistas.

Nunha noite na que houbo destacadas ausencias, o momento máis emotivo chegou coa entrega do premio de honra a Rubén García, creador e director da Mostra de Teatro de Ribadavia, e que tamén foi premiado hai unhas semanas na gala dos María Casares. García, que sofre unha enfermidade dexenerativa, recibiu un aplauso unánime que durou varios minutos, e co que os asistentes á Cea das Letras quixeron recoñecer a achega que a Mostra de Ribadavia e o propio Rubén García veñen realizando ao teatro galego nas últimas décadas.


4,63/5 (8 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



Agustín Fernández Paz recibe o seu premio en presenza de Cesáreo Sanchez
Agustín Fernández Paz recibe o seu premio en presenza de Cesáreo Sanchez
Nancy Morejón foi galardoada co premio 'Escritora Galega Universal'
Nancy Morejón foi galardoada co premio 'Escritora Galega Universal'
'Foto de familia' dos premiados
'Foto de familia' dos premiados