Vieiros

Compostela acolle do 15 ao 17 de maio a Conferencia Internacional de Xornais en Linguas Minoritarias e Multilingüismo na Unión Europea. Baixo o nome de Midas, a asociación formada en 2001 por máis de dez comunidades lingüísticas europeas ten como finalidade a coordinación de estratexias e busca estimular a cooperación nas áreas do intercambio de información, de impresión e márqueting, organizar campañas, promover as publicacións dos seus respectivos membros e obter apoio de institucións europeas para as linguas minoritarias e para os seus medios impresos.

Tras pasar por diversas cidades europeas, como Palma de Maiorca, Bratislava, Helsinki ou San Sebastián, as conferencias de Midas chegan a Compostela organizadas polo xornal Galicia Hoxe e contan coa participación entre outros de membros da Xunta ou do Concello de Santiago de Compostela, da Universidade ou profesionais do xornalismo, a informática e a lingüística. Actualmente máis de 45 millóns de persoas da UE falan unha lingua distinta da oficial dos seus estados, a través destas conferencias ábrese unha oportunidade para a cooperación entre elas.