Vieiros

As mulleres que usan teléfonos móbiles durante o embarazo teñen máis posibilidades de dar a luz cativos con problemas de comportamento, segundo un importante estudo elaborado por recoñecidos investigadores de Estados Unidos e Dinamarca.

Máis de 13.000 nenos daneses (13.159, concretamente), nacidos a finais da década dos noventa, formaron parte da análise, informa o xornal The Independent.

Os resultados, que serán publicados o vindeiro mes de xullo na revistal Epidemiology, proban que o uso dos móbiles dúas ou tres veces ao día é dabondo para multiplicar o risco de que os futuros nenos sufran hiperactividade, disfuncións emocionais ou da conduta así como problemas para se relacionaren na idade escolar.

A probabilidade aumenta aínda máis se os cativos usan o móbil antes de cumpriren os sete anos de idade, despréndese do estudo das universidades UCLA (California) e Aarhus Universitet (Dinamarca).

Relevancia do estudo
A súa relevancia é aínda maior, tendo en conta que Leeka Kheifets unha dos membros do equipo de investigación defendía dende hai tempo que non había evidencias sobre este tipo de relación nociva. Ademais, o estadounidense Sam Milham, pioneiro no estudo deste campo, sinalou a pasada semana que non había dúbida algunha da exactitude dos resultados.