Vieiros

A vindeira fin de semana en Cáceres decídense os tres postos de ascenso á ACB, os tres que lle corresponde á LEB (ouro, prata e bronce).

Mais as olladas están postas nos equipos (da LEB Ouro) que poderían acompañar ao CAI Zaragoza no seu retorno á primeira do baloncesto estatal. Dous nomes están claros, os dous dos primeiros equipos que certificaron esta fin de semana o pase á final a catro: o Bruesa guipuscoano, e o Breogán lugués.

O Bruesa Gipuzkoa impúxose por un só punto, en Donosti, ao outro equipo galego que loitaba polo ascenso, o Beirasar Rosalía. Polo seu lado o Leite Río Breogán gañaba con total autoridade na súa visita ao La Laguna.

Donostiarras e lugueses pasaron cun 2-0 pola peneira previa á Final a Catro. Aínda fican por saberse os outros dous implicados na loita final xa que nos duelo Alicante-Los Barrios e Tenerife-Lleida vai haber un terceiro partido.

Na LEB Bronce tamén están as cousas interesantes na loita polo ascenso, posto que hai un equipo galego, o Ferroplast Coruña, que xoga o seu pase ante o Real Madrid.