Vieiros

Case 33 anos após a morte do ditador, Francisco Franco Bahamonde segue a conservar o título de presidente honorario da Deputación Provincial de Lugo, que lle foi concedido en 1944, e, por se non quedara claro, ratificado un ano a seguir, nunha xuntanza na que era ese renomeamento o único punto do día.

Alén deste título, Franco conserva unha chea de distincións e mencións entregadas pola institución provincial durante a década dos corenta e cincuenta que tampouco foron retiradas aínda, como a medalla de ouro da provincia.

Así o describe o xefe de protocolo da Deputación, Juan Carlos Fernández Pulpeiro, nun traballo publicado no último número da revista Lucensia (coeditada pola Biblioteca do Seminario Diocesano de Lugo e a Fundación Caixa Galicia), no que se inclúe unha listaxe de persoas distinguidas pola entidade nos seus case 173 anos de historia.