Vieiros

As especies ameazadas que máis lles preocupan aos galegos son as cigalas e as pescadas, por riba das aves mariñas. A meirande parte da poboación estaría disposta mesmo a achegar cartos para evitar a súa extinción, segundo unha tese da Universidade de Santiago.

O traballo de Elena Ojea Fernández-Colmeiro baséase nunha enquisa que analiza como valoran as persoas as especies ameazadas, e chega á conclusión de que só incrementarían o investimento coas especies que teñan valor de uso, como son as comerciais mariñas.

A tese aplicou o método de Valoración Continxente, que pregunta á xente sobre a cantidade que estaría diposta a aboar para unha determinada mellora ambiental. O traballo, do Instituto de Estudos e Desenvolvemento de Galicia, dirixido pola profesora María L. Loureiro, conseguiu sobresaliente cum laude.