Vieiros

O encontro terá lugar en Lleida entre o xoves e o sábado e servirá para analizar a situación do sector e posíbeis políticas comúns, con especial atención á industria editorial nas nacións sen Estado na Península. En concreto, participarán editores cataláns e valencianos, vascos e galegos. En representación da Asociación Galega de Editores (AGE) estarán en Cataluña o xerente de Ir Indo Edicións, Xelasio Suárez; o presidente da AGE e director de Rodeira, Afonso García Sanmartín; a xerente de Editorial Galaxia, Alicerce Sampil; e a directora de Baía Edicións, Belén López.

O venres terá lugar unha mesa redonda sobre 'As axudas á edición', na que se reflexionará sobre a situación nos territorios con lingua propia en España e tamén a que se dá no conxunto do Estado español e en Europa. Na xornada do venres, tamén se abordará a 'Repercusión sobre a edición en linguas minorizadas da gratuidade no libro de texto' e 'A colaboración entre editores no intercambio de dereitos de autor'.

Proxección exterior
Para a tarde do venres desenvolverase a mesa redonda 'A proxección exterior das culturas. Experiencias das distintas asociacións. Posibilidade de accións conxuntas: vantaxes e inconvenientes'. A xornada rematará coa presentación da campaña de fomento da lectura promovida polo Departamento de Cultura da Generalitat de Cataluña.AGE espera que deste novo encontro editorial poidan saír definidas "algunhas das políticas de actuación que marcarán o devir do libro nos próximos anos en catro realidades culturais con lingua propia e con moito que ofrecer no mundo da cultura en xeral e a edición en particular", como son Cataluña, País Vasco, Comunidade Valenciana e Galiza. O primeiro dos encontros Galeusca de Editores celebrouse en San Sebastián no mes de maio de 1996, mentres que Santiago de Compostela, foi o marco elixido para o terceiro encontro, celebrado en marzo de 2001 e que virou ao redor da diversidade lingüística ante a cultura global.