Vieiros

O PPdeG aconselloulle á Xunta este domingo que "admita" ante a Unión Europea que pagou con cartos do Fondo Social o contrato da presunta axente electoral María Isabel Blanco, para evitar que Bruxelas poida sancionar a Galiza por facer uso "irregular" deste fondo económico.

Segundo indicaron os populares nun comunicado de prensa, no caso da axente electoral "existiron graves irregularidades dende o punto de vista laboral que afectan aos fondos sociais".

En concreto, acusan a Consellaría de Traballo de conceder, con cargo nese Fondo Social, unha subvención a unha asociación formada por concelleiros e candidatos socialistas para que contratasen unha persoa.

Porén, Blanco "nunca chegou a traballar para esta asociación", senón que o fixo para o sindicato Unións Agrarias e para o PSOE en Arxentina durante 53 días na campaña electoral, "todo iso pagado con diñeiro público da UE", sinalou o PPdeG.

"Non o denunciamos"
Os populares insistiron en pedirlle ao Goberno que "actúe de modo responsábel" e poña o sucedido en coñecemento de Bruxelas para que a UE "non actúe de oficio" e retire os fondos sociais que cada ano concede ao noso país. Ademais, sinalaron que dende o PPdeG "non denunciamos" o caso en Europa "porque non faremos nada que poida derivar en multas millonarias para Galiza".