Vieiros

Vieiros de meu Perfil


Edición xeral

RSS de Edición xeral
De oficio, sabotador televisivo

Enviado a prisión o "profeta do profiláctico"

Logo de interromper máis de 20 mil retransmisións televisivas, Gabriele Paolini, podería ter que ir á cadea polas súas accións en defensa do uso do condón.

Isabel G. Couso - 09:00 17/06/2008

Malia non contar con ningún programa de televisión, Gabriele Paolini é xá un dos personaxes máis coñecidos no panorama audiovisual italiano. O seu costume, xa convertido en oficio, é o de aparecer nos directos televisivos, colarse no plano detrás dos presentadores e sabotear a retransmisión. As súas denuncias son variadas: publicita as súas webs, grita consignas contra Berlusconi, o Papa ou personaxes famosos e promove campañas do máis variado. Na última dirixiu os seus esforzos en promover o uso do condón, despois de que un amigo morrese a causa da SIDA. De aí o seu nome, o "Profeta Profiláctico", alcume de propia acuñación e que publicitou empregando condóns para chamar a atención nas súas últimas aparicións.

O Libro do Guiness recoñécelle a Paolini o record mundial de interrupcións televisivas, nada menos que 20.000. Apareceu no transcurso de noticias vencelladas con actos políticos, deportivos ou sociais. É xa un vello coñecido das canles italianas e aparece alí onde está prevista unha retransmisión en directo, mesmo chegou a aparecer en 6 conexións no mesmo día. Ademais, vense de comprobar que a súa aparición en pantalla fai subir vertixinosamente a audiencia, polo que se sospeita que mesmo algúns programas contactan con el e anuncianlle onde van a dispoñer as súas unidades móbiles.

Ameaza de cadea

A Corte Suprema de Italia vén de ratificar unha sentenza suspendida sobre Gabriele Paolini de tres meses de cárcere por interromper unha emisión da RAI, en xuño de 2001. O Tribunal recoñeceu así que calquera que intencionalmente se incluíse nunha emisión televisiva dende un lugar público podería estar a cometer un delito.

Esta non é a primeira vez que Paolini ten que responder ante a xustiza polas súas aparicións en televisión. Canles e xornalistas denunciarono en diferentes ocasións, mais sempre saíu absolto. Recentemente o Tribunal de Roma declarouno inocente recoñecendo o seu dereito a manifestarse públicamente. Sen embargo, finalmente, semella que o "profeta do profiláctico" terá finalmente que responder ante a xustiza polo seu particular xeito de protesta.


Ligazóns

4.67/5 (3 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: