Vieiros

Volta atrás na modificación que no seu momento introducira o PP e que alongaba até os oito días o espazo de reconto dos votos da emigración, permitindo que o proceso rematase até once días despois dos comicios. PSdeG e BNG acordaron reducir ese prazo de escrutinio até un máximo de tres días despois da celebración das eleccións. A reforma da lexislación electoral galega que estabelecerá ese prazo entrará en vigor antes das próximas eleccións.

"Que problema ten o PP en que o escrutinio se produza o mesmo día en que o de Galiza?", preguntoulle aos deputados do PP o voceiro do BNG, Carlos Aymerich. O nacionalista insinuou que o PP "quere ter unha bala na recámara por se volven algún día ao Goberno". No mesmo sentido, o voceiro do PSdeG, Xaquín Fernández Leiceaga, subliñou que situacións como a creada nas últimas eleccións autonómicas "non son boas" e defendeu a necesidade da modificación. Mentres, o portavoz do PP, Antonio Rodríguez Miranda, retrucou que reducindo o prazo, os seus rivais políticos "pretenden que se conten cantos menos votos mellor". "Se queren que os emigrantes non voten, dígano sen subterfuxios", reprochoulles a socialistas e nacionalistas.

Aprobado o ditame da comisión sobre a axente electoral
Tanto a redución do prazo para o reconto como a proposta para acelerar a reforma electoral necesaria a nivel estatal foron incluídos nas recomendacións do ditame. Ao fío, o BNG pediu que se votasen de xeito separado ao resto, cousa que motivou que o PP tamén solicitase a votación punto por punto das súas propias recomendacións. Malia teren expresado inicialmente a súa vontade de apoiar que fose o Parlamento quen promovese a reforma diante do goberno español, os populares votaron contra a proposta, esixindo que fose a Xunta a que tomase a iniciativa.

Por outra parte, as posicións sobre a presunta axente electoral mantivéronse invariábeis, de xeito que socialistas e nacionalistas aprobaron todas as recomendacións sen o apoio do PP. A emenda do grupo parlamentario do PPdeG pedía o cesamento do conselleiro de Traballo, Ricardo Varela, e a "pública reprobación" do conselleiro de Presidencia e do secretario xeral de Emigración. De xeito paralelo, solicitábanlle ao PSdeG que Varela abandonase o seu cargo á fronte da secretaría de Organización dos socialistas e pedían a maiores a dimisión da deputada Marisol Soneira, actualmente responsábel de Emigración do partido.

Por outro lado, o BNG considera que o ditame "esclarece os feitos con un relato do acontecido que non deixa lugar a dúbidas", subliñando a existencia dun convenio da Xunta con Iberia para a disposición de billetes "de forma graciábel" e do que se beneficiou a suposta axente electoral, María Isabel Blanco. Aymerich sinalou que este convenio debera abrise a outras compañías e ao tempo fixarse un procedemento claro para que "só poida ser usado polos poderes públicos galegos", logo de comprobarse que Blanco viaxou cun billete solicitado pola deputada Marisol Soneira "cunha xustificación inatendíbel".

O voceiro do Bloque advertiu de que este caso "dista de ser unha anécdota" e dixo ver "claras irregularidades" tamén na concesión da subvención pola que se contratou a Blanco, polo que defendeu o reintegro "total ou parcial" da axuda e a apertura dun expediente sancionador "se é o caso". "Claro que houbo irregularidades; e claro que o Goberno debe actuar en consecuencia", engadiu.