Vieiros

O rape págaselle ao mariñeiro a catro euros e medio; nas peixerías acada os 17 euros. O galo pasa de tres euros e medio en primeira venda aos 17 nos expositores ao público. E así unha morea de produtos do mar, que se encarecen ata un 500% dende o proceso de extracción e pesca ata o de venda. Para denunciar esta situación e concienciar aos consumidores, o sector pesqueiro de Celeiro porá en marcha esta fin de semana o Primeiro Mercado Transparente da Pesca.

Os armadores venderán pescada do petisco e do arrastre ao tempo que informarán sobre o encarecemento que experimenta o peixe dende a súa pesca. Ademais, con esta iniciativa, que xa se levou a cabo noutros portos como o de Vigo, o sector quere concienciar á opinión pública sobre os problemas que arrastra a pesca nun momento especialmente conflitivo.

Máis demandas
Entre as súas reivindicacións atópanse tamén a de evitar a importación de pesca ilegal, intensificar os controis e análise hixiénica – sanitaria nos produtos procedentes de terceiros países e promocionar o consumo do produto galego.
A lei obriga a que o peixe que se lle vende ao consumidor inclúa información coma se é procedente de pesca ou de acuicultura ou a denominación clara da especie. O sector pide tamén que se inclúa se se trata de produtos nacionais ou de importación. Asegura que estas medidas benefician aos axentes que interveñen na extracción, distribución e venda de peixe.