Vieiros

O goberno español acaba de aprobar o novo canon dixital, que grava a compra de determinados produtos tecnolóxicos para compensar as entidades xestoras de dereitos de autor fronte ao dereito á copia privada. Como se publica na edición deste xoves no Boletín Oficial do Estado (BOE), ao final, produciuse unha lixeira rebaixa nas taxas que pagarán os teléfonos móbiles con respecto ao que indicaba o borrador.

Os CD terán un canon de 17 céntimos de euro, mentres que o dos DVD será de 44. Os reprodutores de MP3 estarán gravados con 3,15 euros, mentres que os móbiles e PDA que reproduzan arquivos de audio pagarán 1,10 euros, cando nun principio estaba previsto que tivesen un canon de 1,50.

A Orde Ministerial non terá efecto retroactivo, e entra en vigor o 20 de xuño. Ademais, haberá un período de cómputo dun ano para recalcular as taxas segundo a recadación total, que deberá ser non inferior a 110,2 millóns de euros nin superior a 117,8.

O canon dixital é pagado polos fabricantes, non polos consumidores, aínda que é de supoñer que repercutirá no prezo de venda ao público.