Vieiros

Gustavo César Veloso será baixa no Karpin Galicia para o Campionato Estatal de contrarreloxo, no que ía ostentar a representación do equipo galego xunto a Gonzalo Rabuñal e Serafín Martínez o vindeiro sábado en Talavera de la Reina (Toledo).

A súa ausencia está motivada polo falecemento dun familiar seu. Cabía a posibilidade de correr aínda o domingo o campionato de fondo, pero "se o equipo non mo impón, eu prefería case non ir porque non tiven unha preparación axeitada estes días para abordar unha competición deste tipo, e ir por ir tampouco merece moito a pena", engadiu o recente gañador da Volta a Cataluña.

A contrarreloxo queda para Serafín Martínez e Gonzalo Rabuñal
En ausencia de Gustavo C. Veloso, serán Serafín Martínez e Gonzalo Rabuñal os encargados de defender o KGZ na apertura dos estatais o sábado. O ciclista do Rosal atópase satisfeito do momento de forma en que chega a esta cita, logo dunha boa actuación na Ruta do Sur. Martínez máis convencido, se cadra que Rabuñal, ten boas sensacións. Polo seu lado, o de Arteixo di non poder dicir como se atopa "até verme na competición".