Vieiros

Vieiros de meu Perfil


Edición xeral

RSS de Edición xeral
POLICÍAS CONTRA A HOMOFOBIA

Cataluña prepara un protocolo contra as agresións de carácter homófobo

O executivo catalán é o primeiro en recoller unha das recomendacións ás administracións da IV Conferencia Europea de Gais e Lesbianas policías, que acolle Barcelona estes días.

Redacción - 11:15 03/07/2008

Lesbianas e gais denuncian en Catalunya unha media de 23 agresións e discriminacións ao mes, unha cifra que supón un aumento dun 5% con respecto a cifras anteriores. Ante iso, a Generalitat xa anunciou a creación dunha lei contra a homofobia, que debería de estar lista despois do verán.

Ademais, os Mossos d'Esquadra veñen de poñer en marcha un plan especial para a detección e prevención de delitos homofóbicos, despois de que aumentasen tamén os casos de violencia contra gais en poboacións como Sitges. A iso súmase a creación hai un ano da nova Fiscalía Coordinadora de Agresións Homófobas, que permitirá aos Mossos d'Esquadra encamiñar os incidentes deste tipo a instancias especializadas.

Doutra banda, a posta en marcha desta nova lexislación permitirá que insultos, xestos ou manifestacións poidan ser tipificadas como delitos se teñen o agravante de discriminación por razón de orientación sexual, e non só como faltas como acontece agora.

Policías gais e lesbianas
A implicación policial no respecto ao colectivo gai ponse de manifesto estes días en Barcelona, cidade que acolle a Conferencia Europea de gais e lesbianas policías. Organizada por Gaylespol, a primeira asociación española de policías homosexuais, esta cita márcase o obxectivo de que as distintas asociacións de toda Europa expliquen as súas experiencias nos distintos corpos.

Este certame organízase cada dous anos e a Barcelona antecedeulle Amsterdam, Londes e Estocolmo e conta con conferencias sobre diferentes temas como: "a situación dos gais en Europa", relixión, fe e delitos de odio", "boas prácticas policías no marco da non discriminación" ou "a represión policial franquista". Tamén conta coa participación de recoñecidos poñentes, un dos máis destacados é o xuíz Fernando Grande – Marlaska que, dende que se declarou homosexual, está a reclamar os dereitos do colectivo.

Os membros de Gaylespol aseguran estar moi satisfeitos polo encontro e pola asunción de medidas por parte do goberno catalán na loita contra delitos homófobos.


Ligazóns

5/5 (5 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: