Vieiros

A arquitecta e profesora en prácticas do Instituto de Tecnoloxía de Massachusetts (MIT) Sheila Kennedy aspira a ser a primeira en crear unhas cortinas solares. A súa meta é fabricar un material téxtil fotovoltaico que poida aproveitar a enerxía do sol ao tempo que protexe o interior das vivendas da súa luz.

Kennedy asegura, en declaracións a CNN en Londres, que a "enerxía branda" pode revolucionar o mundo das renovábeis. A súa empresa está a traballar cun material fotovoltaico delgado, co aspecto dunha tea. A súa combinación con baterías recargábeis, ocultas no bordo das cortinas, e con diodos emisores de luz poderían contribuír a que os fogares sexan un pouco máis autosuficientes a nivel enerxético. De feito, calcúlase que cubrindo o 10% dun tellado na cidade do Porto, as cortinas solares fornecerían até o 70% das necesidades enerxéticas diarias dun fogar medio.

"Dende o punto de vista técnico, o 'filme fino' pódese producir a grande escala", explica Kennedy, "do mesmo xeito que se pode imprimir e producir un xornal, rolo a rolo. Iso pode facelo moi accesíbel". Polo momento, a súa eficiencia é limitada, e moi inferior á da tecnoloxía solar baseada no vidro, pero Sheila Kennedy confía en que as cousas cambien.

"Agora mesmo estase a investigar en desenvolver filmes tan sensíbeis que permitan que a enerxía se siga a colleitar, mesmo pola noite".

A tecnoloxía que xa existe pódese visitar no museo do deseño Vitra, en Essen, Alemaña, nun prototipo de casa prefabricada chamada 'Soft House'. Os deseñadores están a tomar ideas desa vivenda para aplicalas nun proxecto de investigación para crear unha 'Soft City'.