Vieiros

Vieiros de meu Perfil


Edición xeral

RSS de Edición xeral
Cisma interno no Goberno

O Senado de Arxentina rexeita o polémico imposto ás exportacións agrícolas

O voto do vicepresidente da República, Julio Cobos, foi decisorio. "Non estou traizoando á presidenta. Quero que haxa consenso", afirmou.

Redacción - 11:35 17/07/2008

O Senado arxentino rexeitou esta quinta feira o proxecto de lei do Goberno para aumentar a presión fiscal sobre as exportacións de gran e de manufacturas agroindustriais, causante do duro conflito dos últimos meses entre o Executivo e as patronais de agricultores.

A iniciativa do goberno peronista socialdemócrata da presidenta Cristina Fernández derrubouse polo voto dun home das súas filas, o vicepresidente da República, Julio Cobos, quen tivo que desempatar a votación.

"Non estou traizoando á presidenta. Que envíe outro proxecto. Quero que se alcance un consenso. A historia xulgarame", dixo Cobos, de Unión Cívica Radical (UCR), formación aliada de Fernández deica esta quinta feira.

Proxecto inviábel

A votación rematou con empate a 36. A Constitución estabelece que o vicepresidente da República, presidente do Senado, é quen desempata. A iniciativa volverá agora á Cámara de Deputados, onde a maioría gobernamental carece dos dous terzos necesarios para insistir co proxecto, aprobado alí hai dúas semanas.

As exportacións de grans e de manufacturas agroindustriais de Arxentina, unha grande potencia agrícola, totalizan 35 mil millóns de dólares anuais. Co proxecto de lei, o Executivo esperaba recadar só por dereitos aduaneiros uns once mil dos 24 mil millóns de dólares que xera a colleita de soia, o principal cultivo.


3/5 (2 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: