Vieiros

Se queres saber porque Retranca mide 22 cm... porque leva 9 meses na rúa facendo rir en galego e sen que os obligase a Xunta!!!... Que tarados están detrás deste invento... Non podes perder esta exposición... Deste xeito preséntase a mostra que a partir do día 11 de agosto amosará o proceso de creación de cada número da revista Retranca, a publicación mensual de humor galego, que vai cumprir nove meses.

A través de 40 paneis, situados na Sala de Exposicións Salvador de Madariaga (no número 10 de Durán Loriga, no mesmo edificio onde se atopa o CGAI) revélanse algúns dos segredos da revista dirixida por Kiko da Silva, e faise, como era de agardar, dunha maneira didáctica, amena "e caralludamente divertida".

Na exposición, unha das moitas que nesta semana converterán A Coruña nunha das capitais mundiais da banda deseñada, lémbranse as portadas publicadas até agora, e algúns dos contidos máis rechamantes e comentados.