Vieiros

Non usar "roupa provocativa", coidar as miradas e acenos, non permanecer a soas cun home, aínda que sexa coñecido, non permitir familiaridades co sexo masculino e non admitir chistes picantes. Estas son algunhas das recomendacións que vén de facer a arquidiocese de México ás mulleres católicas para evitar "ser obxecto sexual para os miróns que as rodean violándoas coa imaxinación". A recomendación forma parte dun informe previo ao VI Encontro Mundial das Familias, que se celebrará no país en xaneiro de 2009.

O sacerdote Sergio G. Román é quen asina esta reflexión, que non ten desperdicio. Asegura que hai anos as mulleres mexicanas levaban saias longas, co que os homes só podían albiscar as súas pernas cando chovía. Agora, sen embargo "xa non se precisa agardar á chuvia para verlles os nocellos ás rapazas" porque usan minisaias, embigueiras, calzas ou biquinis, o que fai que a igrexa se pregunte polo pudor. Ademais, o sacerdote asegura que moitas mozas se senten incómodas coas roupas de moda, tal e como se demostra cando a miúdo tratan de baixarse a saia ou taparse o escote, para evitar ser obxecto das miradas.

Ademais, cualifica á vestimenta das mulleres como unha prostitución mental: "cando exhibimos o noso corpo sen recato e sen pudor, prostituímolo porque provocamos nos demais sentimentos cara nós aos que non teñen dereito, é dicir, prostituímonos mentalmente". As demais recomendacións da igrexa mexicana, poden consultarse na súa web Desde la Fe, onde tamén ofrecen outras informacións de interese como se é pecado ou non poñer unha tatuaxe ou se é contrario ao catolicismo crer nos extraterrestres.