Vieiros

Vieiros de meu Perfil


Máis Alá

Xestionado por Vieiros
RSS de Máis Alá
PROXECTO ARTÍSTICO

De que partes do corpo fala a música?

Fernande Viégas e Martin Wattenberg presentan na rede unha análise visual por xéneros das palabras máis empregadas nas cancións en relación coa anatomía humana.

Redacción - 09:40 27/08/2008

Un dos traballos enmarcados dentro do proxecto Fleshmap presenta unha visión moi '2.0' da música en relación co corpo humano. Os artistas Fernanda Viégas e Martin Wattenberg analizaron unhas 10.000 cancións para descubrir de que partes da anatomía falaban máis e representáronas graficamente divididas por xéneros. Os resultados son, cando menos, sorprendentes.

Segundo informa Wired, a meirande parte das cancións e dos xéneros falan principalmente dos ollos, aínda que o blues e o gospel refírense máis ás mans (concretamente a erguelas e a aplaudir). A excepción está no hip-hop, xénero onde o cu cobra especial protagonismo. De feito, este tipo de música é o que fala de máis partes do corpo e, concretamente, a que fai máis referencias sexuais.

Os contidos corporais da música aparecen representados con imaxes de cada unha das partes cun tamaño proporcional á súa frecuencia de aparición nos temas de cada xénero, ao estilo das nubes de palabras. O proxecto preséntase como un estudo "da relación entre a linguaxe e o corpo", e amósase de xeito intuitivo.

O proxecto Listen de Viégas e Wattenberg xa pasou polo MoMA de Nova York, polo Instituto de Artes Contemporáneas de Londres e mais polo Museo Whitney de Arte Americana. Tamén se pode consultar libremente na rede.


0/5 (0 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: