Vieiros

Logo de coñecer a decisión do presidente da Xunta sobre a intención de esgotar a lexislatura, desde a executiva do Bloque advirten da situación de "debilidade política" que, na opinión dos nacionalistas, Emilio Pérez Touriño estivo a punto de precipitar. O coordinador da executiva do BNG, Francisco Jorquera, recordaba este xoves a inminencia do deseño dos orzamentos do Estado ou a negociación do novo sistema de financiamento autonómico, reprochándolles aos socialistas que con eses desafíos por diante teimasen até o último momento na idea do adianto electoral.

Por este motivo, o tamén deputado do BNG no Congreso pídelle a Pérez Touriño que explique con claridade "por que lle trasladou á sociedade un debate electoral interno que creou incerteza xusto no momento en que Galiza menos o precisa". "O BNG nunca viu motivos para o adianto e si para traballar arreo polo país", subliñou Jorquera ao respecto, recordando que a súa formación política recomendou publicamente en reiteradas ocasións a necesidade de esgotar a lexislatura na convicción da necesidade de manter "a estabilidade política e a maioría parlamentaria".