Vieiros

Vieiros de meu Perfil


Máis Alá

Xestionado por Vieiros
RSS de Máis Alá
Ben de Interese Cultural

Expediente sancionador contra o dono do Castelo de Pambre por impedir a súa visita

Polo reiterado incumprimento da obriga de facilitar durante un mínimo de catro días ao mes o acceso gratuíto ao monumento.

Redacción - 13:20 12/09/2008

A Dirección Xeral de Patrimonio Cultural da Consellaría de Cultura abriulle este venres un expediente sancionador ao propietario do Castelo de Pambre, situado en Palas de Rei (A Ulloa). A razón é o reiterado incumprimento da súa obriga de facilitar durante un mínimo de catro días ao mes o acceso con carácter gratuíto ao monumento, declarado Ben de Interese Cultural (BIC).

A apertura do procedemento sancionador, que se pode resolver cunha multa económica de até 60 mil euros, prodúcese logo de "reiteradas comunicacións", segundo informou Patrimonio. O 1 de agosto de 2006 envióuselle unha primeira informativa, solicitándolle unha proposta para o cumprimento da lei.

O 6 de setembro de 2007 o director xeral de Patrimonio Cultural, Felipe Arias, reuniuse co propietario para acordar as medidas a adoptar ao respecto do acceso público ao castelo. Logo, o 26 de decembro pedíuselle información en relación coas actuacións realizadas nese senso.

Dilación do proceso por parte do dono
En todo este período en que se produciron diversas comunicacións e xuntanzas co propietario, este dilatou a presentación dunha solución para a apertura, que nunca chegou a facer efectiva, sinalan dende a Consellaría de Cultura.

O Castelo de Pambre, do século XIV, está considerado un dos mellores exemplos de arquitectura militar medieval do país. Conta cunha muralla exterior de planta irregular e con outra interior cuadrangular, que alberga unha capela do século XII e un hórreo.


4.75/5 (12 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



A construción do Castelo de Pambre data do século XIV / Flickr: lluviavigo
A construción do Castelo de Pambre data do século XIV / Flickr: lluviavigo