Vieiros

"Con pé firme e ao xeito, para non esmendrellarnos", así dixo o rexedor de Lalín, Xosé Crespo Iglesias (PPdeG) que bota a andar a Asociación Voluntaria de Municipios 'Galicia Central', na que o seu concello fai parte, xunto co de Monforte de Lemos, que rexe Severino Rodríguez (BNG), o do Carballiño, dirixido por Carlos Alberto Montes (PsdeG), ou o de Melide, do que é alcaldesa Socorro Cea Vázquez (BNG).

Os tres alcaldes e máis a alcaldesa deron unha conferencia de prensa esta sexta feira en Compostela, para presentar esta andaina pioneira en Galiza que aínda comeza, e que nace para xestionar, dun xeito máis eficaz, os servizos de catro concellos dunha mesma zona, con características e problemáticas moi semellantes, mais pertencentes a distintas provincias (cada un deles a unha das catro que dividen administrativamente Galiza) e con corporacións municipais de distinta cor política. Isto último, se cadra, é o que máis chama a atención deste proxecto (á que Crespo denominou, "se se quere", lobby) mais os rexedores presentes na presentación desta Asociación restáronlle valor a este feito.

Crespo encetou a quenda de intervencións ante a prensa salientando que os alcaldes "somos todos parecidos", no sentido de que todos se enfrontan, tarde ou cedo, a semellantes problemas nos seus municipios. "Todos notamos o bafo dos veciños na caluga", así describía o alcalde popular a presión que, dixo, teñen os rexedores que busacan "o mellor para os nosos pobos, por riba de intereses partidistas".

Neste sentido tamén se pronunciou o nacionalista Severino Rodríguez (escollido como primeiro presidente desta Asociación), que salientou que con este traballo "que non é fácil, mais ilusionador", han tratar de "superar localismos", "poñendo por diante os intereses dos cidadáns e non dos partidos", ao "explorar novos camiños de cooperación e colaboración". "Nós demos un primeiro paso necesario para o interior", que se ha plasmar, segundo dixo, en "sumar esforzos para conseguir servizos de calidade" polos que "ningunha administración ou institución" agás a local loita.

Provincias e partidos distintos, as mesmas problemáticas
Así describiron a situación dos seus concellos os catro rexedores que se xuntaron nesta asociación. Melide, O Carballiño, Lalín e Monforte teñen moitas similitudes, salientaron os alcaldes e máis a alcaldesa, a pesar de pertencer a cadansúa provincia galega (A Coruña, Ourense, Pontevedra e Lugo, respectivamente): "todos os concellos teñen unha importante e semellante demanda de servizos, e un pequeno orzamento (o 13 por cento do total da torta)", dixo Crespo, ao tempo que salientaba que as súas peticións non pasan por "ter un porto deportivo", mais si por cubrir outras necesidades.

A Asociación Galiza Central non nace "contra outras organizacións como a Fegamp", dixo tamén o alcalde de Lalín, ao ser preguntado pola necesidade de crear máis unha asociación intermunicipal, mais si contra as eivas de outros convenios que "non funcionan moito", como as Mancomunidades.

"Os concellos do interior podemos ser a chave dun desenvolvemento alternativo"
Isto dixo a rexedora de Melide, Socorro Cea, quen tamén revelou que se sentía orgullosa de que o seu municipio poida participar en "proxectos comúns e innovadores" que poidan servir de exemplo, tamén nas súas comarcas.

Nesta liña falou tamén o rexedor do Carballiño, Carlos Alberto Montes, quen dixo que os catro concellos que agora se asocian teñen "o mellor das áreas rurais e o mellor das vilas", uns puntos en común que é preciso "potenciar e dinamizar".

As chaves da Asociación Voluntaria de Municipios 'Galicia Central'
Galicia Central vai funcionar como unha economía, a escala, que permitirá, segundo os alcaldes e a alcaldesa dos catro concellos asinantes, xestionar, de xeito máis eficaz, os servizos públicos. Os alicerces desta Asociación creáronse en febreiro en Lalín, e, a partir da súa constitución formal desta sexta feira, ha funcionar como unha entidade sen ánimo de lucro, cunha presidencia rotatoria e itinerante, que viaxará dun concello a outro, segundo de quen sexa a quenda de mando. Para aforrar custos e optimizar recursos, os membros das corporacións municipais dos catro concellos han traballar tamén para a Asociación.

A xunta directiva da entidade estará composta polos catro alcaldes dos municipios que a integran e por un concelleiro de cada un deles, así como por un tesoureiro e un secretario, ámbolos dous funcionarios do concello de onde sexa o presidente. Aínda non se falou de orzamento (queren facer mínimos os gastos: "no que nos metamos habémolos sacar para adiante, a pufo non vai quedar", segundo Crespo), mais si de vindeiras actuacións, como a posibilidade de traballar unha candidatura ao Interreg IV, na que os catro concellos han presentar os seus proxectos para a reactivación económica a través da agricultura ecolóxica e o ecoturismo.

A colaboración xa comezou coa organización dun concurso de fotografía, varios concertos e certames musicais e a vontade de desenvolver as olimpíadas escolares de 2008-2009.