Vieiros

Logo de que este xornal revelase que a Consellaría de Educación volveu subvencionar este ano a colexios privados que non permiten a existencia de aulas mixtas, a CIG-Ensino anuncia que vén de presentar un contencioso administrativo diante do Tribunal Superior de Xustiza de Galicia (TSXG). Os servizos xurídicos do sindicato pretenden que se anule a orde publicada o pasado 27 de agosto no DOG polo que se subscriben e modifican os concertos educativos. Por medio desta orde, a Xunta volve destinar fondos públicos a cinco centros vinculados ao Opus Dei e que separan a nenas de nenos nas aulas (Las Acacias, Montecastelo e Aloya en Vigo; Montespiño e Peñarredonda na Coruña)

A CIG-Ensino considera que “é totalmente incomprensíbel e inaceptábel” que a Consellaría de Educación subvencione “ao cen por cen” centros que “incompren flagrantemente a lexislación, imposibilitando un ensino coeducativo”. O sindicato nacionalista considera que a consellaría está a ceder á presión “de centros vinculados a posicionamentos retrógrados e con idearios ultraconservadores e reaccionarios”.

Hai que lembrar que a LOE (Lei Orgánica da Educación) aposta pola coeducación de nenos e nenas. Este mesmo ano, unha sentenza do Tribunal Supremo deulle a razón ao goberno de Castela-A Mancha que decidiu retirarlle en 1999 as axudas a aqueles centros que segregaban o alumnado por razóns de sexo. Nun primeiro momento os tribunais anularon esta decisión, pero o Tribunal Supremo considera que a administración pública ten dereito a exixir aulas mixtas naqueles centros privados que axuda a financiar.

Noticias anteriores en Vieiros:

• A Consellaría de Educación destina cartos públicos a colexios que segregan nenas e nenos (13/06/2008)
• Educación estudará retirarlle as axudas a centros que separen nenas e nenos (13/06/2008)
• Educación volve subvencionar colexios privados que non permiten aulas mixtas (23/09/2008)
• Os sindicatos exixen que a Xunta anule as axudas a colexios que separan nenas e nenos (24/09/2008)
• Educación revisará as subvencións dos colexios que se neguen a ter aulas mixtas (24/09/2008)