Vieiros

Para Richard Nixon, presidente de EUA entre 1969 e 1974, "o fenómeno Castro (Fidel, primeiro ministro de Cuba) era unha cuestión moi emocional. Cría que perdera as eleccións presidenciais de 1960 e tamén os comicios a gobernador de California (en 1962) por culpa de Castro".

As declaracións son de Henry Kissinger, daquelas conselleiro de Seguridade do goberno estadounidense. O cineasta alemán Stefan Lamby recólleas no documental Henry Kissinger - Geheimnisse einer Supermacht (Henry Kissinger, segredos dunha superpotencia), estreado esta semana na canle de televisión franco-xermana Arte, segundo informa a axencia de noticias DPA.

"Evitar na figura de Allende (Salvador, presidente de Chile) un segundo Castro foi unha obsesión para Nixon; ese tema preocupáballe moito máis que calquera outro", di Kissinger. Converteuse nun "pesadelo persoal", engade o galardoado co Premio Nobel da Paz o mesmo ano do golpe militar de Pinochet.

"Accións encubertas a través da CIA"
Ademais, varios funcionarios daquela administración sosteñen no filme que o goberno de EUA interviu directamente contra o goberno de Allende porque, afirman, "era un axente pagado pola KGB". Un destes é Alexander Haig, xefe de gabinete de Nixon que despois sería xefe da OTAN e secretario de Estado do goberno de Ronald Reagan.

Haig relata como EUA organizou "unha serie de accións encubertas a través da CIA, similares a outras previas en Latinoamérica, que tiveran moito éxito baixo administracións anteriores, por exemplo evitando a chegada ao poder dos comunistas en Brasil e Guatemala".

Porén, Kissinger afirma no documental que "persoalmente non tivo ningún plan" contra o goberno socialista de Allende. "Nixon daba ordes directas aos servizos de intelixencia, as que eu por suposto non me opuña", confesa o que logo tamén sería secretario de Estado.

"Igual que Kennedy e Johnson"
No entanto, tamén recoñece que "era importante facer algo, porque en 1962 xa vimos como os rusos instalaron mísiles en Cuba e unha base para submarinos en Cienfuegos. En Arxentina había practicamente unha guerra civil. Non foi un invento de Nixon, os presidentes Kennedy e Johnson tamén practicaron esta política".

Por outra banda, o documental de Stefan Lamby analiza o papel de Kissinger na guerra de Vietnam, e a súa influencia como asesor do presidente George W Bush.