Vieiros

Vieiros de meu Perfil


Edición xeral

RSS de Edición xeral
OLIGOPOLIO

Tres empresas teñen as tres cuartas partes do negocio dos hipermercados

Un estudo da Universidade da Coruña conclúe que Galiza conta con menos superficies e cunha dimensión menor.

Redacción - 09:00 31/10/2008

Gadisa é o principal grupo de distribución alimentaria, cun 23,1% de cota de mercado. Séguenlle Eroski, cun 22,8% e Carrefour, cun 18,7%. Entre os tres copan máis da metade do negocio dos hipermercados, chegando até un 64,6%. Con estes datos, Galiza convértese na cuarta do Estado Español en concentración de establecementos en mans dun puñado de empresas. Só a superan A Rioxa (72,6%), Euskadi (67,8%) e Cantabria (65%). Ademais, é de destacar que os grupos galegos contan cunha posición nada depreciábel a nivel co Estado, xa que Gadisa conta co 1% do negocio e Froiz acada o 0,6%. Estes son algúns dos datos que se desprenden dun estudo elaborado pola Universidade da Coruña para o Tribunal Galego de Defensa da Competencia (TGDC). O informe, que está coordinado por Laurentino Bello e Andrés Faíña, ofrece unha ampla radiografía sobre a distribución minorista de base alimentaria dende a perspectiva da competencia.

Tamén é salientábel a gran concentración que existe no segmento de tendas de desconto, precisamente neste eido que desenvolve políticas máis agresivas na competencia de prezos. O líder é a cadea Día (Grupo Carrefour), que ten o 82% da superficie de ventas. Mentres, o Lidl dispón do 17%, o que deriva nunha clara situación de monopolio neste sector.

Retroceso do mercado tradicional
Outra conclusión é que o sector experimentou unha profunda transformación, de xeito que o comercio tradicional deixou paso nos últimos anos ás grandes superficies. Así, por exemplo, entre 1995 e 2005, as tendas de barrio reduciron a súa participación dende o 35,6 até o 29,6% no conxunto do consumo alimentario. Pola contra, os supermercados e hipermercados acadan importantes aumentos nas súas cotas de xeito que o gasto dos fogares se eleva dende o 35,5% até o 44,7% no mesmo decenio.

Tendas máis pequenas
Doutra banda, unha cuestión a destacar é a diferenza nas dimensións entre os nosos supermercados e os máis habituais no Estado Español. Primeiro Galiza conta cun menor número de hipermercados por cada mil habitantes (a media galega é de 6,5 fronte á estatal de 7,8) e despois a dimensión media dos establecementos é de 7.120 m2, fronte aos 8.060 de media no Estado.


Ligazóns

5/5 (2 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: