Vieiros

Vieiros de meu Perfil


Edición xeral

RSS de Edición xeral
Denuncias de violación aos dereitos humanos

O xefe do exército de Colombia dimite polo asasinato de 11 mozos que facían pasar por guerrilleiros

É unha práctica estendida que consiste en matar civís e exhibilos coma se fosen membros das FARC. Uribe xa botou 27 militares por amosar "resultados de guerra".

Redacción - 11:00 05/11/2008
Uribe, anunciando a pasada semana a destitución fulminante de 27 militares, acompañado do ministro de defensa e o xefe das Forzas Armadas

Uribe, anunciando a pasada semana a destitución fulminante de 27 militares, acompañado do ministro de defensa e o xefe das Forzas Armadas

A finais da pasada semana, o presidente colombiano, Álvaro Uribe, facía unha primeira e histórica purga no exército do seu país, botando 27 militares, entre eles tres xenerales e 11 coroneis, acusados da desaparición de mozos dos barrios pobres de Bogotá, que foron achados mortos, vestidos de guerrilleiros, a moitos quilómetros da capital. Os militares destituídos terán agora que responder ante a xustiza.

Ao parecer, varias ONG defensoras dos dereitos humanos tiñan denunciado máis dunha vez esta práctica, que consiste en amosar "resultados de guerra". A raíz do escándalo, Uribe cuestionou a xerarquía militar pola súa neglixencia no control da tropa e na investigación dos casos. Uns días despois, xusto esta terza feira, o xefe do exército de Colombia, o xeneral Mario Montoya, renunciaba ao seu cargo.

As "execucións extraxudiciais" do exército colombiano
Os 11 mozos asasinados polo exército de Colombia tiñan desaparecido en xaneiro deste ano, na zona de Soacha, nos suburbios da capital, Bogotá. Os seus corpos acháronse a 400 quilómetros de distancia, coma se fosen mortos en combate e fixesen parte das Forzas Armadas Revolucionarias de Colombia (FARC).

Arestora, a Fiscalía colombiana investiga 657 denuncias de chamadas execucións extraxudiciais, que involucran a 688 militares. Destes, xa foron condenados 43. Os casos de "falsos positivos" (asasinatos de mozos aos que se fai pasar por guerrilleiros, para engordar as estatísticas e conseguir recompensas) multiplicáronse. "Non todos os falsos positivos son iso", din fontes do Ministerio de Defensa. "Hai erros e hai denuncias falsas por parte de círculos achegados ás FARC, pero tamén casos reais, e imos por eles. Queremos blindar o sistema". Mais para as organizacións defensoras dos dereitos humanos, o goberno colombiano tardou demasiado en reaxir.


2.33/5 (3 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: